О великая Христова угодница, преподобная мати Марие! Услыши недостойную молитву нас, грешных (имена), избави нас, преподобная мати, от страстей, воюющих на души наша, от всякия печали и находящия напасти, от внезапныя смерти и от всякого зла, в час же разлучения души и тела отжени, святая угодница, всякую лукавую мысль и лукавые бесы, яко да приимет души наша с миром в место светло Христос, Господь Бог наш, яко от Него очищение грехов, и Той есть спасение душ наших, Емуже подобает всякая слава, честь и поклонение со Отцем и Святым Духом, во веки веков. Аминь. |
О Пресвятая Дево, Мати Господа Вышних Сил, Небесе и земли Царице, града и страны нашея всемощная Заступнице! Приими хвалебно-благодарственное пение сие от нас, недостойных раб Твоих, и вознеси молитвы наша ко Престолу Бога Сына Твоего, да милостив будет неправдам нашим и пробавит благодать Свою чтущим всечестное имя Твое и с верою и любовию покланяющимся чудотворному образу Твоему. Несмы бо достойни от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорей Заступнице нашей: услыши нас, молящихся Тебе, осени нас вседержавным покровом Твоим и испроси у Бога Сына Твоего пастырем нашим ревность и бдение о душах, градоправителем мудрость и силу, судиям правду и нелицеприятие, наставником разум и смиренномудрие, супругом любовь и согласие, чадом послушание, обидимым терпение, обидящим страх Божий, скорбящим благодушие, радующимся воздержание: всем же нам дух разума и благочестия, дух милосердия и кротости, дух чистоты и правды. Ей, Госпоже Пресвятая, умилосердися на немощныя люди Твоя; разсеянныя собери, заблуждшия на путь правый настави, старость поддержи, юныя уцеломудри, младенцы воспитай и призри на всех нас призрением милостиваго Твоего заступления; воздвигни нас из глубины греховныя и просвети сердечныя очи наша ко зрению спасения; милостива нам буди зде и тамо, в стране земнаго пришельствия и на Страшнем суде Сына Твоего; преставльшияся же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, Слава небесных и Упование земных, Ты по Бозе наша Надеждо и Заступнице всех притекающих к Тебе с верою. К Тебе убо молимся и Тебе, яко Всемогущей Помощнице, сами себе и друг друга и весь живот наш предаем, ныне и присно, и во веки веков. Аминь. |
Боже сил исцеляяй всяк недуг, и всяку язю в людех, очисти раба Твоего (имярек), и не даждь человеку и демону преобщения. Запрети нечистым духам, сокруши сатану под ноги раба Твоего, обнови его Святым Твоим Духом, соедини его святей Твоей Церкви и всякого действа противолежащего избави, представи Святому Твоему жертвеннику, и Пренебесных и Животворящих Таин сподоби. Яко Ты еси Бог кающихся, и Тебе славу воссылаем Отцу, и Сыну, и Святому Духу, ныне и присно и во веки веков. Аминь. |
Господи Боже правды, крепость моя и помощник, и прибежище мое в день злой. Ты спасеши во время скорби, спаси мя. Яко внидоша воды до души моея, углебох в тимении глубины, и несть постояния, от лица насильствующих; яко погна враг душу мою, попра в землю живот мой, во всю нощь поборя оскорби мя. Благоволи Господи, еже избави мя от рук беззаконнующа, и обидяща яко да не согрешу Тебе; зане страх смертный нападе на мя и покры мя тьма. Доколе воззову Господи, и не услышиши, возопию к Тебе обидим и не спасеши. Призри с небесе Господи и виждь от Святаго Дома Твоего и Славы Твоея; где есть множество щедрот Твоих, по милости Твоей, яко претерпел еси нас; Господи суди обидящия мя, не буди яко человек спяй, и яко муж не могий спасти. Яко милостив и человеколюбец Бог еси, и Тебе славу воссылаем Отцу, и Сыну, и Святому Духу, ныне и присно и во веки веков. Аминь. |
